Deall ein profiadau
Gall yr hyn sy’n digwydd i ni yn ystod plentyndod effeithio ar y ffordd yr ydym yn ymateb i sefyllfaoedd neu emosiynau penodol a dylanwadu ar ein gweithredoedd yn y dyfodol.
Mae’n bwysig deall a yw ein gorffennol yn effeithio’n negyddol arnom nawr ac i estyn allan os oes angen cefnogaeth arnom.
Gall cael pobl sy’n ein cefnogi ei gwneud hi’n haws delio â’r profiadau hyn a dod i delerau â nhw.
Rheoli straen
Weithiau gall bywyd fod yn llawn straen. Gall ychydig bach o straen fod o gymorth wrth ein hysgogi i weithredu. Ond pan fydd straen yn para am amser hir, boed hynny oherwydd trafferthion ariannol, problemau mewn perthynas neu achosion eraill, gall gael effaith negyddol ar ein hiechyd corfforol a meddyliol. Mae hefyd yn cynyddu’r risg o ddatblygu problemau iechyd meddwl cyffredin fel iselder neu orbryder.
Mae siarad â phobl rydym yn ymddiried ynddynt a neilltuo amser ar gyfer gweithgareddau rydym yn eu mwynhau yn bwysig i leihau teimladau o straen. Os ydym yn ei chael hi’n anodd ymlacio ac os yw straen yn effeithio ar y ffordd rydym yn meddwl, yn teimlo ac yn gweithredu, efallai y bydd angen i ni siarad â gweithiwr iechyd proffesiynol i gael cymorth ychwanegol.
Deall ac ymdopi â sefyllfaoedd newidiol
Gall bywyd fod yn brysur ac yn anhrefnus o bryd i’w gilydd; mae’n newid yn gyson a gall hyn arwain at ymdeimlad o golli rheolaeth. Mae’n bwysig ein bod yn gallu deall ac ymdopi â sefyllfaoedd newidiol a all achosi straen, fel salwch, digwyddiad trawmatig, cynnydd mewn costau byw neu broblemau mewn perthynas.
Pan allwn ni wneud synnwyr o sefyllfa, ni waeth pa mor anodd ydyw, gallwn gymryd rheolaeth a dechrau meddwl beth i’w wneud nesaf. Pan fydd hynny’n digwydd, rydym yn teimlo’n dawelach.
Gallwn ddysgu delio â straen trwy bwyso a mesur sefyllfaoedd o’r gorfennol, neu drwy siarad ag eraill sydd wedi bod trwy rywbeth tebyg.
Esbonio lles meddyliol
Dysgwch mwy beth mae lles meddyliol yn ei olygu a’r pethau a all effeithio.
Darganfod mwy
