Bale Syml

Datblygwyd yr offeryn hwn fel rhan o Cwtsh Creadigol, a oedd yn ganolbwynt lles creadigol ar-lein ar gyfer y gweithlu iechyd a gofal yng Nghymru, a grëwyd gan Gyngor Celfyddydau Cymru mewn cydweithrediad ag artistiaid ledled y wlad.

Mewn partneriaeth â Chyngor Celfyddydau Cymru, rydym yn gyffrous i rannu’r offeryn lles meddyliol hwn, ochr yn ochr â llawer o adnoddau creadigol eraill, gyda phawb yng Nghymru!

Krystal ydw i a dwi’n ddawnswraig, yn goreograffydd, yn llenor, yn cyfarwyddwraig, ac yn fam o Gymru sy’n dod yn wreiddiol o ynys fach o’r enw Bermuda! Symudais i Gymru yn 2012 ar gyfer bale!

Mae gen i dros ddeng mlynedd o brofiad o hwyluso gweithdai symud i gyfranogwyr anabl a chyfranogwyr sydd ddim yn anabl, o bob oed. Rydw i eisiau grymuso cymunedau drwy symud.

Dechreuais ddawnsio’n 7 oed, ac roedd hyn yn gyfle i mi feithrin fy hyder, cadw’n heini a mynegi fy hun. Erbyn hyn, dwi’n treulio fy ngyrfa yn rhannu fy nghariad at symud gydag eraill.

Ymunwch â mi mewn cyfres o sesiynau bale syml er mwyn symud yn ysgafn wrth ddysgu arddull newydd o ddawnsio. Mae’r gyfres hon o weithdai i bobl o bob oed gymryd rhan gyda’i gilydd.

Felly, cydiwch mewn cadair, cefn soffa, neu orffwys eich llaw ar wal wrth i ni ddechrau gyda rhywfaint o ymarferion bale ‘barre’ i gynhesu’r corff yn raddol.

Yna byddwn yn mynd i ganol yr ystafell a, gyda’n gilydd, byddwn yn defnyddio’r un camau barre i symud hyd yn oed yn fwy. I orffen, byddwn yn rhoi popeth rydym wedi’i ddysgu at ei gilydd mewn dawns bale fer cyn oeri’r corff/ymestyn.

Does dim angen unrhyw beth newydd arnoch chi i gymryd rhan yn y gyfres hon o weithdai. Gwnewch yn siŵr eich bod chi’n gwisgo dillad cyfforddus, bod gennych chi rywfaint o ddŵr gerllaw, a gwneud yn siŵr nad oes unrhyw beth ar y llawr a allai achosi unrhyw niwed i chi.

Barod? Ffwrdd â ni!

Adnoddau gan Krystal Lowe (dolen Saesneg yn unig) a Jonathan Dunn (dolen Saesneg yn unig).