Teithiau Cerdded Canu

Mae’n bosibl y bydd dolenni ar y dudalen hon yn mynd â chi at wybodaeth a ddarperir gan sefydliadau eraill, nad yw efallai ar gael yn Gymraeg.

Mae’r erthygl hon yn egluro sut y gall canu a threulio amser ynghanol byd natur yng nghwmni eraill gefnogi lles meddyliol. Mae’n edrych ar sut mae gweithgareddau cerdded a chanu ar y cyd yn rhoi ffordd greadigol i bobl fynegi eu hunain, i deimlo’n llai unig ac i feithrin ymdeimlad o gymuned. Drwy ddod at ei gilydd yn yr awyr agored, gall pobl ddarganfod ymgysylltiad, hyder a chefnogaeth drwy brofiadau syml a rennir.

Gwyliwch y fideo ac archwiliwch sut y gallai gweithredoedd syml o ymgysylltu a chreadigrwydd gefnogi eich lles meddyliol.

Mae Ayoub Boukhalfa yn artist, yn ganwr-gyfansoddwr ac yn berfformiwr sy’n hwyluso gweithdai cerddoriaeth ar y cyd â Chôr WOW. Sefydlodd gôr ar gyfer y cymunedau LHDTC+ yn ddiweddar. Mae Ayoub yn rhugl mewn Arabeg, Ffrangeg a Saesneg ac yn awr mae’n plethu caneuon Cymraeg i’w berfformiadau. Mae ei waith yn dathlu cyfnewid diwylliannol a phŵer cerddoriaeth a rennir.

Fel arweinydd hyfforddedig teithiau cerdded ar diroedd isel, mae Ayoub yn arwain ‘Teithiau Cerdded Canu’ misol gyda phobl sy’n chwilio am noddfa. Mae’r rhain yn cael eu cyflwyno fel rhan o brosiect y Celfyddydau ac Iechyd a ariennir gan Gyngor Celfyddydau Cymru mewn partneriaeth â Ramblers Cymru, CAVAMH a Mind Caerdydd. Mae’r teithiau cerdded hyn yn dwyn ynghyd natur, symud a chanu grŵp i gefnogi lles a lleihau’r ynysigrwydd cymdeithasol y mae ffoaduriaid a cheiswyr lloches yn aml yn ei brofi.

Mae ymchwil yn dangos y gall canu fod yn dda i’r corff yn ogystal â’r meddwl, gan y gall helpu i leihau pwysedd gwaed, sefydlogi’r anadlu a chyfradd curiad y galon, lleihau straen a lleddfu rhai o effeithiau trawma.

I lawer o bobl sy’n chwilio am noddfa, mae gweithgareddau fel Teithiau Cerdded Canu yn rhoi cyfle iddyn nhw siarad, gwrando a rhannu eu baich gydag eraill sy’n deall eu sefyllfa.

Ar adeg pan mae straeon negyddol, camwybodaeth a rhethreg negyddol am bobl sy’n chwilio am noddfa yn gyffredin, mae prosiectau fel Teithiau Cerdded Canu yn helpu i rannu naratif gwahanol. Drwy berfformiadau meddylgar, llawn dathlu sy’n dangos gwerthfawrogiad o fywyd, mae gwaith Côr WOW yn annog adegau o ymgysylltu, undod a dynoliaeth gyffredin sy’n herio stereoteipiau, yn newid meddylfryd ac yn meithrin croeso.

Mae stori Ayoub yn dangos y gall hyd yn oed brofiadau syml a rennir ein helpu i deimlo mwy o ymgysylltiad a chefnogaeth, a bod modd ymdopi â heriau bywyd.

I’r rhai sydd â diddordeb mewn archwilio cyfleoedd tebyg, mae sefydliadau fel Ramblers Cymru a Cerdd Gymunedol Cymru yn cynnig nifer o ffyrdd i gymryd rhan, boed hynny drwy grwpiau cerdded, gweithgareddau cerddorol neu brofiadau cymunedol eraill sy’n dod â phobl ynghyd.

Os hoffech chi ddarllen rhagor am sut y gall gweithgareddau fel canu a threulio amser yn yr awyr agored eich helpu i ymdopi â heriau bywyd, ewch i  Hwyl wrth Ganu – Hapus a Dos dyddiol o natur er llesiant – Hapus