Mae hanes, treftadaeth a diwylliant i gyd yn gysylltiedig â ffyrdd eraill o wella lles meddyliol. Mae’r rhain yn cynnwys:

• dysgu
• creadigrwydd
• byd natur
• sut rydyn ni’n cysylltu ag eraill

Dysgu am ein gorffennol

Mae dysgu a phrofi pethau newydd ynddynt eu hunain yn dda ar gyfer lles meddyliol. Pan fyddwn yn dysgu am hanes y bobl a’r lleoedd o’n cwmpas, gallwn deimlo hyd yn oed mwy o gysylltiad â nhw.

Mae dysgu am ein treftadaeth ein hunain yn cyfrannu at ein hymdeimlad o hunaniaeth a pherthyn. Gall dysgu am dreftadaeth a diwylliannau pobl eraill gynyddu goddefgarwch ac empathi.

Gall dysgu o’n gorffennol hefyd ein helpu i wneud synnwyr o adegau anodd a’n helpu i deimlo’n obeithiol am y dyfodol.

Dyma fideo byr wedi’i gynhyrchu gan Cadw ac Amgueddfa Cymru sy’n esbonio sut all ddysgu am ein gorffennol a chymryd diddordeb yn ein safleoedd hanesyddol fod o fudd i’n lles meddyliol.

Ymwneud â hanes

Gall rhyngweithio â’n treftadaeth a’n diwylliant gynyddu ein hyder a’n hemosiynau cadarnhaol.

Gallai hyn gynnwys gweithgareddau fel ymweld ag amgueddfeydd, cestyll, henebion, tai hanesyddol, neu eglwysi. Gall trin gwrthrychau hanesyddol ac archwilio eitemau o’r gorffennol hefyd fod yn ffordd dda o gysylltu â’n hanes a’n diwylliant.

Gall fod drwy fwynhau creadigrwydd ein cyndeidiau trwy gelf neu bensaernïaeth. Mae gwerthfawrogi lleoedd a thirweddau sy’n bwysig i’n hanes a’n diwylliant yn ffordd wych o deimlo cysylltiad â’n gorffennol hefyd.

Gallwn archwilio ein treftadaeth naturiol trwy ymweld â’n tirweddau, parciau hanesyddol a gerddi lleol.

Gall cysylltu â’n gorffennol fel hyn ein helpu i deimlo’n rhan o rywbeth mwy.

Teimlo fel ein bod ni’n perthyn

Gall cymryd rhan mewn gweithgareddau sy’n gysylltiedig â hanes, treftadaeth a diwylliant fod yn dda i unigolion a chymunedau (linc Saesneg yn unig). Gall ymweld â lleoedd, cymryd rhan mewn prosiectau neu wirfoddoli ein helpu i gwrdd â phobl a gwneud cysylltiadau cymdeithasol newydd.

Gall gwerthfawrogi treftadaeth bob dydd ein milltir sgwâr ein helpu i deimlo’n falch o ble rydyn ni’n byw, neu o ble rydyn ni’n dod, a hyd yn oed ein grymuso fel cymuned.

Mae teimlo cysylltiad â’n treftadaeth a’n diwylliant ein hunain a deall sut mae’n cyd-fynd â hanes ehangach pobl a lleoedd, yn helpu i feithrin ymdeimlad o berthyn (linc Saesneg yn unig). Mae hyn yn dda i’n lles meddyliol.