Gall gwneud rhywbeth creadigol ein helpu i edrych ar fywyd yn wahanol a chael safbwyntiau newydd ar bethau a all fod yn peri pryder i ni. Efallai y byddwn yn gwneud rhywbeth gartref neu gyda grŵp, mynd i sioe neu ymweld ag oriel.

Ffyrdd o fod yn greadigol

Gallwn ni fanteisio ar ein creadigrwydd mewn cymaint o ffyrdd. Gallai fod drwy goginio, garddio neu weithgareddau chwaraeon, canu neu ddawnsio. Neu gallai fod drwy weithgareddau mwy goddefol hyd yn oed, fel gwrando ar gerddoriaeth, a all fod yn dda iawn i’n lles meddyliol.

Manteision creadigrwydd

Mae astudiaethau ar draws seicoleg, iechyd y cyhoedd, a niwrowyddoniaeth yn dangos bod lles meddyliol yn gwella drwy fod yn greadigol. Mae’n rhoi ymdeimlad o bwrpas a chyflawniad i ni,ac mae’n gwneud i ni deimlo chysylltiad ag eraill. Mae bod yn greadigol yn ein helpu i reoli ein hemosiynau a theimlo’n fwy cadarnhaol yn gyffredinol.

Mae ymchwil yn dangos bod creadigrwydd yn dda i bawb, ni waeth beth yw ein hoedran (linc Saesneg yn unig).

Babanod

Er enghraifft, gall canu a cherddoriaeth helpu i greu perthynas glos rhwng babanod a’u gofalwyr a gall gefnogi datblygiad iaith wrth i blant dyfu i fyny.

Plant a phobl ifanc

Gall bod yn greadigol helpu plant a phobl ifanc i deimlo’n fwy hyderus, deall eu hunain yn well, rheoli eu hemosiynau ac ymdopi â chyfnodau anodd.

Oedolion

Gall ymgysylltu’n rheolaidd â gweithgareddau creadigol leihau’r risg o iselder a gorbryder a gall hyd yn oed helpu i gadw ein meddyliau’n finiog wrth i ni heneiddio.