Mae natur o’n cwmpas ni i gyd a gall hyd yn oed cyfnodau byr o amser yn cysylltu â natur fod o fudd i’n lles meddyliol. Gall eiliadau a dreulir yn gwerthfawrogi byd natur dawelu a thanio teimladau o syndod a rhyfeddod, sy’n dda i’n lles.

Mae ymchwil ddiweddar wedi nodi pum llwybr i gysylltu â byd natur. Roedd y rhain yn cynnwys:

• defnyddio ein synhwyrau,
• myfyrio ar sut mae natur yn gwneud i ni deimlo,
• sylwi ar harddwch natur,
• archwilio ystyr natur, a
• theimlo tosturi tuag at natur.

Gall defnyddio’r llwybrau hyn helpu i roi hwb i’n lles meddyliol, ein helpu i deimlo mwy o gysylltiad â byd natur a’n hysbrydoli i ofalu am fyd natur.

Gadewch i fyd natur dynnu eich sylw – sylwch ar y golygfeydd, y synau. Nid oes rhaid i chi fynd am daith gerdded hir yn y wlad i gael y buddion. Gall cymryd amser i wrando ar yr adar, sylwi ar y sêr, plannu pot blodau neu osod tŷ pryfed ein helpu i deimlo’n gysylltiedig â byd natur.

Gobaith am y dyfodol

Gall y pryderon am yr argyfyngau hinsawdd a natur gael effaith negyddol ar ein lles meddyliol. Gall cymryd camau i ofalu am ein byd naturiol helpu i fynd i’r afael â’r argyfyngau hyn a’n helpu i ymdopi â theimladau o ofid am y byd naturiol.

Mae gwneud pethau fel cerdded neu seiclo yn lle gyrru, plannu blodau gwyllt, lleihau gwastraff neu ymuno â mentrau lleol fel plannu coed neu gasglu sbwriel i gyd yn gamau cadarnhaol y gallwn eu cymryd. Gall cymryd camau o’r fath ein helpu i ddod o hyd i obaith ar gyfer y dyfodol a helpu i amddiffyn natur.

Gall cymryd camau fel hyn ein helpu i ddod o hyd i obaith ar gyfer y dyfodol a helpu i ddiogelu natur.