Beth bynnag fo’ch diddordebau, mae’n debyg bod grŵp o bobl sy’n ymddiddori yn yr un pethau â chi. Chwilotwch ar-lein, rhannwch eich diddordebau gydag eraill, neu holwch yn eich llyfrgell leol – maen nhw’n lleoedd gwych i gael gwybodaeth ynglŷn â gweithgareddau yn y gymuned ac i ddysgu drwy ddarllen wrth gwrs!

Mae dysgu yn dechrau gyda bod yn chwilfrydig

Dysgwyr ydym ni i gyd, yn chwilfrydig am y byd o’n cwmpas. Chwilfrydedd wnaeth ein hannog i archwilio a chodi ar ddwy droed yn ystod y misoedd cyntaf ein bywyd. Mae bod yn chwilfrydig yn wych ar gyfer ein lles meddyliol, ond mae’n nodwedd sydd weithiau’n pylu wrth i ni fynd yn hŷn.

Gellir meithrin chwilfrydedd drwy ofyn cwestiynau neu roi cynnig ar bethau newydd a phan mae hynny’n digwydd, mae’n ein helpu i addasu, yn cefnogi lles meddyliol cadarnhaol a gall hyd yn oed helpu i amddiffyn ein cof wrth i ni heneiddio (dolen Saesneg yn unig).

Dysgu am y byd o’n cwmpas

Mae cymaint i ddysgu amdanynt, ac mae cyfleoedd o’n cwmpas ym mhob man – yn y byd digidol ac mewn realiti. Mae byd natur yn llawn cyfleoedd i ddysgu, o ddod i adnabod y creaduriaid sy’n byw o dan y ddaear, pryfed, planhigion a ffyngau, i edrych i fyny fry i ddysgu am yr adar neu’r sêr yn yr awyr nos.

Gallwn ddysgu am ein hanes lleol a theimlo’n fwy cysylltiedig â’n hardal leol neu ddysgu am ein teulu. Neu gallwn ddysgu sgiliau newydd, megis rhoi cynnig ar rysáit newydd neu ddod o hyd i ffyrdd newydd o fynegi ein creadigrwydd.

Dysgu am y bobl o’n cwmpas

Mae dysgu hefyd yn gallu golygu darganfod mwy am y bobl o’n cwmpas. Gall bod yn chwilfrydig am brofiadau pobl eraill, eu meddyliau a’u teimladau ein helpu ni i gysylltu’n fwy ystyrlon a magu a chynnal perthnasoedd (dolen Saesneg yn unig).